2

Ma quimatican Yn ixquichtin quitasq[ue] Ynin amatl quename Yn
nehuatl notoca Juana Velasques tihuan Yn theoYotica nonamic Se
bastiano Velasques nican tichaneq[ue] Ypan Ynin tlahtocaaltepetl
Ciu[da]d chololan Ypan tipohui Cavesera S[an]ta Maria tecp[a]n pilopan
Tiquitohua ca neli melahuac ticpia se tlaltzintli tohuaxca
totlatqui mani Ytocayocan tecpan ecatlan Yn iquisaianpa to
nali quitepanoha Juana galisia auh in icalaquian tonali
quitepanohua Yn itoca Juan de S[a]ntiago ahu in tlaxcalancopa
quitepanohua Yn don salvador minto ahu in atlixcopa
huei otli Connamiqui omotamachiuh Ynic hueiac quipia
ompohuali Yhua[n] nahui Baras Yhuan tlahco auh innic patlahuac
quipia matlactlomei baras Mestoc ahu in axcan tiquitohua
tihuan Yn theoyotica nonamic Ca tosenYolocacopa totlanequi
listica ticnamaquiltilia Ynin tlali Yn Yehuatzin Pili don
Salvador Minto Yhua[n] Yn theoyotica Ynamic sihuapili doña
clara franques ahu in ipatiuh mochihua senPohuali Pesos=
tomin Ystac chipahuac theocuitlatl tomatica otoconseliq[ue]
Yca on Yn axcan tiquinsenmaca tiquinmaxcatia Yn omo
teneuhque Pili don Salvador minto Yhuan Yn sihuapili doña
clara franques Ynic huelitis quipiasq[ue] quitequipanosque
quename Ynmaxca Yntlatqui ahu in tehuantin no cuel
Ytla tiquimihtlanilisque Ypampa Ca huel tosenyolocacopa
otiquinnamaquiltiliq[ue] Yc ticmotenehuilia Yn dios itlaso
mahuisocatzn Yhuan Ymachio Yn s[an]ta crus ca aic timo
xicosque ytechpa ynin tenenonotzalis auh intlasemanian
timoxicosque opa yxquich tiquincuepilisq[ue] Yn ipatiuh
yn tlalcohuanime Yhuan ticpolosq[ue] Yn totlal auh itla
aca tlahtolehuas anoso quistos Yaxca Ytlatqui Yxpan
quineltilis Yn justisia Yn quinmixquechilia Yn tohuei
tlahtocatzin Rei anoso S[an]ta Yglesia anoso jues gov[ernad]or alcaldes
ordinarios Ynic Yehuantzitzin conneltilisq[ue] conchica
huasq[ue] Ynin amatl omochiuh nican ciu[da]d chololan
axcan Yc sempohuali Yhuan chiquasen tonali mani
metztli noviembre de mil seisientos y noventa y seis años
Ymixpan testigos [item] Ju[an]o valiente [item] Ju[an]o de la crus tetequi
c quineltilique Yca Yn intoca Yn infirmas no nehuatl
niamatlacuilo noloneltilia Yca nofirma
Bernaue de cartenas